Wie die Kontaktbeschrängungen kame, hot sichs Lewe veännert. Awwer, wenn ichs so genaa betrachde, for mich wars eichendlich gar nit so schlimm. Klar, es hot schun ganz scheen weh gedun, dass mer de Meeschdertitel, dene mer mit meine Fußballmannschaft, bei der ich Betreuer bin, so souverän gewunn harre, nit uff em Platz feiere konnde, un aach, dass ich mei 70. Geburtsdaach im Mai absaan muschd, war nit scheen. Awwer suscht? Mer is es eichendlich gut gang. Mer konnde enaus gehn un do bin ich eene iwwer de annere Daach losmascherd. Es Weere hot dezu noch im Friehjohr un de ganze Suumer iwwer metgespielt, un so honn ich alle zwedde Daach mei Spazeergäng un Wannerunge gemacht. In de  ganze Geschend bin ich erum gerennt un aach, wenn ichs schun vorher gewuschd honn, mer is werre deitlich for Aae gefehrt wor, wie scheen uuser Heimat doch is. Neije Weech bin ich gang, un manchemol honn die mich aach in die Err gefeehrt, so dass es midde im Wald nimme weire gang is. Dann bin ich wie frieher eenfach querwaldin, bin iwwer Stock un Steen gekrawwelt, bis ich irjendwann werre mei Weech gefunn hat. Aach um Arwet un Vedienschd muschd ich mer kee Sorje mache, ich bin jo Rentner. Das enzische was mer richdisch gefehlt hot, war, dass ich mei Enkelcher nimme in de Aame nemme dorft. Das hot wergelich weh gedun!

Schlimm hots dogeje annere getroff. Familie, die in enge Wuhnunge ohne Balkon midde in de Stadt lewe un nimme vors Loch dofde. Die Leit, die er Arwet velor honn orre ehrem Beruf nit meh nogehn konnde. Reschdaurangbesitzer, Kinschtler, Schausteller, kleene Selbstännische u.s.w., Leit, die sich Gedanke mache muschde, wies for sie weire gehn sollt. Die Kinn dorfde nimme in die Schul un de Kinnergaade, die Spielplätz ware gesperrt, Freinde treffe konnde se nit. Die viele Leit, die krank wor sinn, met em Virus gekämpft honn un lang gebraucht honn, bis se die Krankheet iwwerwunn harre.  Un dann die Dausende die gestorb sinn!

Doch sesamme hommer die erschd schlimm Zeit geschafft. Die Leit honn sich an das gehall, was die Virologe un Politiker gesaat honn, sie honn sich die Hänn gewäsch, Abstand gehall un ehr Maske uff gesetzt. Jetzt awwer meene anscheinend einische, es wär schun alles vorbei. Sie demonstreere geje Beschrängunge, halle dobei kee Abstand un tran bewuschd kee Maske. Die bekloppdeschde Theorie were uffgestell un in die Welt enaus posaunt. Ei guckt auch doch emol die Länner aan, bei dene er Uwerdeppe Corona veharmlost honn un Masketran for Bleedsinn halle. Brasilie, England, die USA. Do, wo die Iwwerschlaue ehre Wisseschaftler nit gefolischt sinn un gemeent honn, sie wischde alles besser, sinn hunnertdausende  von ehre Landsleit krank wor un gestorb. Dobei het mer met eenfache Middel vieles vehinnere kenne!