O Gott, was bin ich das so dick

der Schneematsch stännisch uff de Stroß,

was wär das nor for mich e Glick,

were de Winder mer schun los!

Ball werre kimmt die scheene Zeit,

Friehjohr die Welt met Grien bedeckt!

Die Käll sinn endlich mer geweit

un Vohlsgezwitscher dich dann weckt!

Beim Friehjohr denk ich an April,

an Reen, an Wind, manchmol an Sunn.

Es Weere macht doch was es will,

uns Unkraut wächst im Gaade schun!

Im Suumer jo, do is es scheen,

s` is waam, so daß mer schwimme kann,

un omends noch spazeere gehn,

met Freinde feiere dann un wann!

Her uff, dann is doch viel zu heeß,

 Migge dauern um ehm flieje,

vom Kerber rinnt der naß de Schweeß,

 als fat musch-de um dich zieje!

Wenn bunt die Wälder werre sinn,

un`s reife Äbbel, Trauwe, Niss,

die Wärm noch in de Heiser drin,

das is die scheenschde Zeit gewiß!

Dann stirmts doch oft, un Newel wallt,

daß mer beim Fahre kaum was sieht,

un draus do werds schun werre kalt,

vun Weschbe mer e Stich als krieht!

Im Winder, wenn es drin scheen waam,

e Kerzje brennt gemiedlich dann,

steht in de Stubb de Weihnachtsbaam,

dodran mer sich erfreie kann!

Der een will`s waam, der anner kalt,

mer kann`s nit jerem mache recht!

So is-ses jo im Lewe halt,

der een find`s gut, der anner schlecht!

Jed Zeit is scheen, so wie se is,

ob waam, ob kalt, ob weiß, ob grien,

un liewenswert is jed gewiß,

mer muß halt nor die Scheenheet siehn!