Winderschbaß

Es hot geschneit, die Schul is aus,

die Schliere schnell erausgehul,

un gleich geht`s in de Schnee enaus.

Im Benzeloch un in de Huhl,

do treffe sich die Kinn jo ball,

heit det mer saan: „Mann, das is cool!“

Am Miehlebersch im freije Fall

die Dodesbahn enunner dann,

das traue sich bestimmt nit all.

Was hom-mer Schbaß met alle Mann,

wenn`s flott de Bersch enunner geht,

un jeder fährt so oft er kann.

E schaafer Wind debei do weht,

die Ohre were strack vor Käll,

fat gehn e paar schun vun de Meed.

Gebaut weerd dann e Schanz aach schnell,

e Schbrung muß jeder mache jo,

es is jo noch e Zeitlang hell.

De Schleifkarre zum Start gezoh,

schun flieht mer weit iwwer die Schanz,

Bauch, Been un Aame sinn ball bloh.

Egal, Hauptsach de Kerl is ganz,

es Lewe is eenfach nor Schbaß,

un weire geht noch lang der Danz.

Allmählich sinn die Kleere naß,

die Bux, die Hännsche un die Kapp,

un die Gesiechder were blaß.

Met Langbank, Schliere zieht mer ab,

hemm gehn Meed un aach die Buwe.

Kalt is en all, un das nit knapp,

die Fieß, die komme in de Uwe!