Jetzt isser do, de Advent. Die Zeit, wo mer uus uff Weihnachde un die Geburt vum Jesus vorbereite solle. Weihnachde! Vor viel die scheenst Zeit im Johr. Awwer Diesjohr is alles annerschd. Corona hot uus noch feschd im Griff, un mer kenne nit so mache, wie mers gewiehnt sinn. Weihnachtsfeiere bei de Veeine, in de Firme un met de Clique sinn vebot. An Weihnachde selwer derf mer nore met zeh Erwachsene sesamme feiere. Ja awwer, is das schlimm? 

Vielleicht lisst uus das emol e bissje ruhischer were, wemmer nit so viel Stress met der viele Feierei honn, un es erinnert uus werre me an de eischendliche Sinn vun dem Feschd. Wenn ich dran serick denke, wie ich noch geschafft honn un zudem Vorsitzender vum Sportverein war, harr ich als an jerem Wocheen zwee bis drei Weihnachdsfeiere. An Heilisch Omend warschde dann total kabutt un froh, dass Weihnachde ball erum war.  Außerdem, met zeh Leit un de Kinn noch dezu an Weihnachde feiere, das langt doch! Orre? Mer kann met de Familie sesamme sein, met dene Mensche, die mer lieb hot, un dass is doch wohl es Wichdischsde! Denkt emol driwwer noh!

Wies Weihnachde frieher bei uus dehem war, kennder unne heere. Alleh dann, in dem Sinn e froh un besinnlich Adventszeit.